Uppá hestin aftur
“Jú, kom tú endiliga”, segði altíð hjálpsama og blíða Jacklin hjá Berg Hestum, tá eg ringdi og spurdi, um eg kundi koma niðan og bara líka royna at sita á einum rossi aftur - áðrenn regluliga venjingin á ríðiskúlanum byrjaði aftur um hálvan september.
Ryggbrotin í 3 mánaðir
“Liggur tú ryggbrotin aftan fyri eina hurð?” spurdi skemtiligi beiggi mín fyrst í juni, tá hann ringdi at fregnast, hvussu til stóð. Minnist ikki akkra, hvør tað nú var, sum lá ryggbrotin aftan fyri eina hurð - men setningurin er úr onkrum gomlum ævintýri. Mátti so siga honum, at ryggbrotin var eg - lá tó ikki aftan fyri eina hurð, men í bleytu sofuni við fjarstýring, fartelefon og eini ringiklokku á borðinum. Klokkuna hevði sonurin givið mær - og so kundi eg bara ringja, um tað var nakað, hann skuldi geva mær - fitt!
Orsøkin til brotna ryggin var, at eg var dottin av mínum fitta gangara, Stormi. Vit komu ríðandi niðan á kappríðingarbreytina - á veg til undirvísing hjá Berg Hestum fyri skjótt 4 mánaðum síðani - tá mín annars ofta kanska heldur dovni hestur gjørdist kløkkur av onkrum og sprakk avstað oman eftir breytini. Royndi at steðga honum, men tað riggaði ikki rættiliga, so hugsaði eg: “Gott er, vit renna bara, hann steðgar fyrr ella seinni”. Men tá vit nærkaðust Berg Hesum sneiddi hann knappliga oman eftir eini lítlari gøtu, sum er millum breytina og vegin - og har fleyg eg av - niður í vegin og so út av vegnum og oman í grasið…
Av, av, av - ambulansa, sjúkrahús, kannast, skannast, røntenfotograferast osfr. Rossafólk eru týpiskt mest ørkymlað um, nær tey kunnu ríða aftur, so fyrsti kanska býttisligi spurningurin hjá mær, meðan eg lá har á børuni, var: “Hoyr tit, kann eg fara á ríðiferð í Íslandi um 3 vikur - ja, ha????” Men gakk, brotnan rygg-geisla, ilt í nakkan og grúuliga ilt í knæið, so eg mátti skjóta ein hvítan píl eftir at ríða í Íslandi - men eg fór tó við til Íslands - meira um tað eina aðru ferð. Teir næstu tríggir mánaðirnir gingu við at ganga við korsetti og mest møguligt binda frið.
Upp á hestin aftur!
“Op på hesten igen”, siga danir og tað skuldi eg jú - og eg var so bangin fyri at eg fór at blíva bangin, tá eg skuldi upp á aftur. So eg var so sera spent, tá eg fyri umleið trimum vikum síðani endiliga aftur kundi lata meg í ríðiklæði og fara niðan til Jacklin at royna meg - og góða ríðivinkan, Rannvá, var so fitt at koma við sum stuðul!
Og eg var SLETTIS ikki bangin! Sum eg var glað! Aftur at sita á rossabaki - ein so herlig kensla! Ryggurin og knæið brokkaðu seg eitt sindur, men onki at tosa um. Eg reið eina løtu runt í høllini á fitta og mjúka Garpi - og gleddi meg bara til næsta ríðitíma.
Ríðing við eggum!
Vit hava nú verið tvær ferðir til undirvísing síðani - og seinast hevði okkara dugnaligi venjari, Elisabeth, funnið uppá, at vit skuldu ríða við ráum eggum í hondini - og sjálvandi helst uttan at missa ella bróta eggini! Hetta fyri at læra okkum hvussu leyst/fast, vit skulu halda í teymunum og fyri at vit skuldu læra at slappa av í ørmum og akslum. Ofta hava vit hug at sita og spenna og so læsast vit í kroppinum og gera alt verri fyri okkum sjálv, ríðingina og rossið. Ein góður og læruríkur tími - og onki egg brotnaði!