Fá kryddurtirnar úr handlinum at trívast heima í vindeygakarminum

Býlið

Kryddurtirnar, sum tú keypir í pottum í handlunum, eru aloftast vaksnar undir serligum umstøðum upp á stutta tíð, og júst tí eru tær ikki serliga sterkar og harðbalnar, og ofta eru tær torførar at fáa at vaksa heima í vindeygakarminum, men við nøkrum góðum ráðum, so eydnast tað kanska at fáa kryddurtir at trívast í vindeygakarminum.

Eftir: Tóru Effersøee Mortensen Mynd Veitari 24.05.2023

Størri pott

Potturin, sum kryddurtirnar eru í, tá ið tú keypir tær í handlunum, er ikki ætlaður til, at plantan skal vaksa í honum. Hon er alt ov tætt plantað til at kunna vaksa, so planta um í ein størri pott við eitt sindur av nýggjari mold.

Vatna væl

Kryddurtirnar skulu vatnast regluliga – jú heitari veður, jú meiria vatn. Tá ið tú vatnar, er eitt gott huskot at fylla vaskið við vatni og síðan seta kryddurtirnar í vaskið í 10-15 minuttir, so tær súgva alla ta vætu, teimum tørvar, í seg. Lat vatnið verða lunkað - kalt vatn gevur rótunum eitt sjokk. Um tínar kryddurtir standa í leirpottum, skulu tær hava meira vatn enn plantur í plastpottum.

Ljós

Kryddurtirnar trívast best í ljósið, tí er ein vindeygakarmur móti vesturi besta staðsetingin hjá kryddurtunum.

Tøð

Um veturin er ikki neyðugt at tøða, men frá umleið mars mánaðia er gott hjá kryddurtunum at fáa tøð.