Í februar fluttu vit á Kvinnu inn í nýggj høli í miðbýnum í Havn – hølini høvdu tørv á at blíva frískaði upp, og tí fall valið á máling og nógvar frískar litir. Við litum hava vit givið nýggja kontórinum eitt kreativt huglag, sum vit stórtrívast í. Fleiri hava spurt um litirnir, so nú deila vit nakrar myndir og litkotur. Og vit hava eisini savnað góð ráð til tín, sum hevur hug at finna málingarulluna fram. Vit hava fingið góða vegleiðing frá Colorama á Hálsi, so vit funnu júst teir litirnir, vit ynsktu. Og vit hava málað við máling frá Jotun Lady.

Áðrenn tú fert í Colorama á Hálsi
Hugsa um, hvat fyri huglag tú ynskir tær at skapa og leita tær íblástur ymsastaðni – í býlum, á heimasíðum og á sosialum miðlum. Áhugavert er at síggja, hvussu onnur hava samansett litirnar í teirra býli.   
Ger tær greitt, um tú ætlar tær at mála eitt heilt rúm ella bert ein einstakan vegg. Ein veggur í einum nýggjum liti kann lættliga broyta huglagið í rúminum. Rákið loyvir eisini fleiri litum í sama rúmi, men hvat dámar tær best? 
Hugsa um, hvørjir litir og hvat huglag hóska til verandi innbúgvið. Um heimið er nýtt og innbúgvið nýmótans, so kunnu heitir litir fjálga um. Um rammurnar harafturímóti eru eldri, og innbúgvið eisini hevur nógv ár á baki, so kunnu fagrir litir geva rúminum ein lættan dám.  
Ivast tú enn, hvat tað rætta er til tín, so eru starvsfólkini hjá Colorama á Hálsi klár at vegleiða tær.