Kom inn og síggj snildu, vøkru og kulu loysnirnar í íbúðini hjá Jóhonnu á Oyrasundskollegiinum
28 ára gamla Jóhanna Norðberg Niclasen úr Havn lesur til lærara í Keypmannahavn og býr á Oyrasundskollegiinum saman við unnustanum, Jóhann Kartna, og døtrunum, Mikkalinu og Jonnu Sofíu. Íbúðirnar á Oyrasundskollegiinum eru ógvuliga lítlar, men tað hevur ikki steðga henni í at finna snildar, heimagjørdar loysnir til næstan alt.
– Eg haldi, eg vil kalla mín stíl "organiserað órudd".... Tað er ikki altíð lætt, tá tú hevur smábørn. Tú ruddar, og so ganga tað 15 minuttir, og so er alt bumbað aftur... Míni bestu ráð eru at fáa alt upp frá gólvinum... tað gevur nógv meira luft í einum lítlum rúmi, sigur Jóhanna.
– Eg eri uppvaksin við, at kynsleiklutirnir eru javnt býttir. Um nakað, hevur mamma bygt, lagt flísar og annað meira enn pápi mín, so fyri meg hevur tað ongantíð verið ein spurningur um kyn, sigur Jóhanna, sum heldur, at kvinnur eins so væl kunnu byggja, sum menn!
– Man kann spyrja, hví eg tími at gera alt sovorðið, tá vit kortini skulu flyta út um nøkur ár. Men eg tími ikki at búgva her í 4-5 ár og bara finna meg í fyribilsloysnum
– Vit hava gjørt so nógv, sum eisini er tikið niður aftur. Nýggj hugskot koma alla tíðina, og onkuntíð rigga tey ikki, og so má tað broytast. Hendan loysnin við loftsong í kamarinum hjá endru dóttirini riggar tó ógvuliga væl.
Í summar hava Jóhanna og familjan búð á Oyrasundskollegiinum í trý ár, og tey kundu ikki ímyndað sær at búð nakra aðrastaðni í Keypmannahavn júst nú.
Hendan greinin er ein brellbiti av longri býlisgrein. Øll greinin við fleiri myndum kann lesast í Kvinnu, sum er í sølubúðunum nú.
